PROIEKTU: BIZI JOLAS

Gaur egungo irakaskuntzaren gabezi baten erantzuna eta gorputz heziketa bermatzeko euskarazko proiektua da hau;  elkarbizitza hobetzeko asmoa jarraitzen duena baita ere.

Proiektuaren ikuspegian eta helburu nagusian haurraren garapen osoa dago: gorputza, adimen emozionala, adimen intelektuala… Etnomotrizitatearen ikusmoldetik abiatuz jokatzen da: pertsona, ingurua, izadia, objektuak, besteak, denbora, ohiturak, kultura, hizkuntza…

Ludikotasunak du garrantzi handia: jolasa/jokoa/kirola.. Ikaslearen autoestimuan, autokontzeptuan, motibazioan, egoerak irakurtzeko gaitasunean, norberaren indarguneak/ahulguneak identifikatzerakoan… eragina du, hitz bitan, NORBERAREN EZAGUTZAn.

Jolas asketik jolas bideratuetarako ibilbidea egiten dute. Jolas egoera ziurgabeek haurrengan duten balio pedagogikoan sinisten dugulako. Zeharka ere lantzen dira ohikoak ez diren harremanak, gaitasun motoreak, sormen gaitasuna, materiala berrien ezagutza eta ohikoei “beste” erabilpen bat eman daitekeela ikustea… Espazioen erabiltzea, osasuna eta osotasunaren ikuspegia… guzia, euskararen atxikimenduarekin.

Gure partehartzea

Proiektua Seaskako beste ikastolekin lantaldean abiatu da, urteetan proiektu honetarako formakuntza eta saioen prestaketarako egun desberdinak baliatuz eta ikastoletan Xiba-Orekaz-eko, gaur egun, BIZI-JOLAS kideen interbentzioarekin kurtsoetan. 3.zikloko ikasleei zuzendua (4.eta5.urtekoei)

PROIEKTU: ELKAR BIZITZA

Elkar bizitzaren oinarriak: gogoetarako, debaterako, adostasun eta ezadostasunendako…parada dute ikasleek geletan.

Nola landu:
Ama ikastolan (3-5 urte) adimen emozionalaren lanketarekin, haur literaturarekin eta bere egunerokotasunean elkarbizitzako saioekin.
Lehen mailetan (6-7 urte) kooperazio kontseiluekin, filosofia debateekin eta KiVa formakuntzatik jasotako informazio, material eta saioen betetzearekin osatzen dugu elkarbizitza arloa.

Zer dira Kooperazio kontseiluak?

Kooperazio kontseiluak, egitura sozial batean (gela) eta kooperazio harremanetan oinarritzen den ikasle eta irakasleen arteko bilkura da. Proposamenak egiten dira, entzuten da, negoziatzen da eta erabakiak hartzen dira.Ikaslea gizaki bezala eraikitzen ahal da, aldi berean, talde bateko partaide sentituz. Ikasleen arteko harremanak eta gelako lana hobetu dezake.

Zer dira filosofia txokoak?
Filosofia txokoak, haurrek, beste arloetan pausatzen ez dituzten galdera unibertsalak pausatzeko espazioa sortzea dute helburu; kuriositatea sortzea nolabait. Argumentatzen eta pentsamenduak besteekin partekatzen ikastea.

Haurrek modu egokian mintzatzen ikasten dute: nire ustez, nik pentsatsen dut, ez naiz ados, milesker entzuteagatik… besteak epaitu gabe entzuten eta beraiek epaituak izan gabe. Desadostasuna agertzen ikasten dute, enpatia garatzen baita arazoen antzinean irtenbide kolektibo bat bilatzen.

Zer da KiVa formakuntza?

KiVa saioak, eskola jazarpenaren kontrako finlandiar egitasmo pedagogikoa da. Bi urtez talde pedagokikoa formatu eta programa praktikara eraman ostean, egitasmoaren onurak baieztatu ditzakegu.

Honengatik, Gure Ikastolako Eskola proiektuan Elkarbizitza arloan txertatua geratu da eta egunerokotasunean lanean darraigu, prebentzioan lan handia eginez eta behar diren interbentzioak gauzatuz, ikasitako moduekin eta protokoloak erabiliz.

JANTEGIAN, HAURRAK AKTORE

Hezitzaileak, gurasoak, jantegiko langileak…guztiak bat datoz jatordua bera eta bazkaldu osteko denbora-tartea heziketarako une garrantzitsuak direla baieztatzean.

Gure Ikastola. Gaztelu Zahar (7-11 urte bitarteko ikasleak):

Eskola proiektuarekin bat eginik, jantegiko langileek erakasleekin elkarlanean, bazkaldorduan  haurrak aktore eta oinarri bilakatzen dituen proiektu pedagogikoa abian jarri zuten 2019an. Proiketu honen helburuetako bat, egunerokotasunean, haurrei autonomia ematea da eta, hori lantzeko gure modua, jantegietan adin nahasketa eta arduren banaketa egitea da.

Autonomiaz gain, beste erronka batzuk betetzeko bidea ere bada programa hau: batetik,  batetik, jantokia gune hezitzailearen identifikazioa; bigarrenik, bertan sortzen diren lanpostuen “lan-kargari” balio ematea; eta hirugarrenik, elikadura burujabetsua: elikagaiak bertakoak, garaikoak eta osasuntsuak izatea.

ZUBIAK ERAIKIZ

Zubiak Eraikiz hitzarmenaren lan ardatza, ikasleen arteko harremanak sendotzea eta talde bakoitzaren dinamikaren mugarriak zabaltzea da. Orereta Ikastola eta Gure Ikastolaren izan baziren ekimen honetako aitzindari, egun 5 dira programa honetan parte hartzen duten ikastolek.

Bi topagune antolatzen ditugu; udaberrian lehenengoa, non elkar ezagutzeko irteera bisita, bazkaria…egiten dugun eta udazkenean bigarrena, “Lore Jokoak” oinarri hartuta, 5 ikastoletako ikasleek egindako lanen erakusleiho eta topagunea.

Euskal Lore Jokoak:

Euskal Lore Jokoak,  XIX. mendean antolatutako kultura jardunaldiak izan ziren, musika, dantza eta batik bat euskal poesia barne hartzen zituztenak. “Euskal Pizkundea” deitutako garaiaren barruan burutu zituzten. Geurean, Ipar Euskal Herrian abiatu ziren lehenik, Antton Abbadiaren eskutik. 1853an lehendabiziko aldiz antolatu zituzten Urruñan eta, hamar urtez jarraian, udalerri hartan burutu ziren. Gerora, eta XX. mende hasiera arte, Euskal Herriko beste toki batzuetan egin izan zituzten, Beran, Maulen, Azpeitian edota Aramaion, kasu.

Lore-Jokoen ekitaldia oinarri hartuz, Gure Ikastola lapurtarraren (“L” Lapurdi) eta Orereta Ikastolaren (“Ore” Orereta) arteko topaketa antolatzen dugu; jokoen bitartez, elkar ezagutzeko, urtean zehar eginiko lana erakusteko eta gozamenerako unea. Poesia, antzerkia, plastika, kirolak, musika, bertsolaritza arloetan ikasleek eginiko jarduerak izango dira egunaren ardatzeko.